MÁIS APADRIÑAMENTOS...

Hoxe tocounos a nós ser os apadriñados. O alumnado de 4º veu buscarnos para contarnos un conto que prepararan para nós. Ao finalizar agasalláronnos con debuxos ou marcapáxinas do conto. Foi unha actividade moi bonita.
Grazas compañeiros e compañeiras!

ACTIVIDADES MAIO E XUÑO

Nestes últimos días de curso, levamos un ritmo frenético con tantas actividades interesantes que nos quedaban por facer. Nesta entrada imos facer un resumo dalgunhas delas.

OBRADOIRO DE CONTOS CON MIRÓ:

Esta actividade consistiu en decorar a parede exterior da biblioteca. Antes era un muro feo e sucio, pero dende que renovamos o Bibliocastelo tiñamos moitas ganas de decoralo. Eliximos a mellor das maneiras: cun contacontos! e para iso nos axudou Esteban, o TARABELO. Neste vídeo podedes ver como foi o proceso.

Agora temos un muro precioso. No facebook de Tarabelos podedes ver máis fotos.

Mil grazas, Esteban!!!

CREACTIVITY:
Un día apareceu no patio do colexio un autobús moi especial. Dentro del, un montón de cousas rarísimas estábannos esperando. Pero... que eran? Pois nada menos que obxectos para experimentar e aprender ciencia!!!
Entre eles había material de robótica, un panel enorme para crear labirintos, desafiamos a lei da gravidade co tubo de aire e, o que máis nos gustou: uns ordenadores para crear as nosas películas con stopmotion! Foi un día xenial😄

APADRIÑAMENTOS LECTORES 2019

Hoxe, o alumnado de 1º tivemos unha actividade moi especial. Voltamos ao cole de Infantil para lerlle un conto aos pequeniños do cole. Ao chegar, despois de redescubrir os nosos recunchos favoritos do cole, buscamos unha parella para lerlle as poesías.

O libro elixido foi POEMAS CON PIRULETA (Carlos Fontes e Leandro Lamas), xa que o traballamos moito na clase e como son poemas moi bonitos e con ilustracións coloridas, aos peques encantoulles. 

Ademais, fixémoslles uns debuxos coas ilustracións dos nosos poemas favoritos e eles agasalláronnos con outros.

Ao final da actividade as profes tiñan unha sorpresa: unha PIRULETA para cada un de nós.

Foi xenial!!!

Podedes ver máis información neste enlace: LARETASDEBUEU

SACHANDO CONTOS CON TARABELOS!

Hoxe, o alumnado de 1º B tivemos a grandísima sorte de ser os elixidos para realizar o ensaio xeral do novo espectáculo de TARABELOS. Trátase do SACHACONTOS, unha combinación de debuxo, imaxinación, creatividade e diversión guiada polo contacontos Esteban.

Ao longo da sesión fixemos un debuxo cada un que se convertiron nunha historia, creamos monstros, robots, persoas e animais con moitos ollos, brazos e orellas (tal e como nos decían os dados) e aprendemos a sachar contos.

Gustounos moitísimo e agradecémoslle a Esteban que pensara en nós para levar a cabo esta actividade tan proveitosa. Desexámoslle moitos éxitos!

O DÍA DE CARLOS CASARES

 

 O xoves foi un día ben completo... Primeiro, asistimos a unha animación sobre Carlos Casares co bardo Abelardo.

   Os rapaces e rapazas de 2º e 3º aprenderon sobre a vida deste autor e desmostraron canto sabían sobre os seus libros: As Laranxas máis laranxas de todas as laranxas, a Galiña Azul, o can Rin e o lobo Crispín e as aventuras de Toribio. Todo isto amenizado cun acordeón! Que ben o pasaron todos!

Pero, isto non remataba aí... xa que baixamos ao Centro Social do Mar e asistimos á representación do libro sobre o noso animal favorito: A Galiña Azul.
 En escena atopamos a Ana, a nena que emigrou; a Leoncio, a Xabier, o neno loiro e traste; a Lorenzo, ao alcalde Manolito Listón, ao garda de tráfico e a veciña.

LA LISTA DE...

Durante este trimestre, na materia de LINGUA CASTELÁ, lemos un libro chamado LA LISTA DE CUMPLEAÑOS de Anna Manso e ilustrado por Gabriel Salvadó.

Foi un libro divertido que nos encantou a todos e que levamos para as casas para lelo sempre que queiramos. O que nos quixo ensinar a autora a través desta pequena novela foi a facer LISTAS. Contounos que a súa lista preferida é a dos contos que leu de pequena e invitounos a escribir a nosa lista para poder engadir o seu libro. Seguro que o faremos!

Pero ademais, nós quixemos facer outra lista relacionada co noso proxecto LER ARTE, e o que fixemos foi escribir en cada aula de 1º unha lista coa nosa OBRA DE ARTE preferida.

Mirade que listas tan artísticas!

CONTACONTOS CON IAGO LÓPEZ

Hoxe, na HORA DE LER, recibimos no Bibliocastelo a visita de IAGO LÓPEZ, da man da Editorial Anaya. 

Iago contounos "AUGUSTA E OS SEUS MEDOS", de Sabela Fernández Trelles, unha historia dunha nena que tiña tantos medos que non quería facer nada, ata que os seus pais lle deixaron unha caixa no seu dormitorio...

Gustounos tanto e estabamos tan metidos na historia que o tempo pasou sen darnos conta. Iago invitounos a contar o conto con el, tiñamos que facer xestos, responder preguntas... enganchounos completamente! Ademais trouxo con el unha caixa grande e en cada un dos seus lados estaba ilustrada unha escena da historia, moi artístico!!!
Agardamos que este libro chegue cedo á Biblioteca para poder lelo nós, grazas Iago!

CAL É O TEU LUGAR DE LECTURA PREFERIDO?

Hai uns días recibimos unha carta de Papirus onde nos pedía que fixeramos unha foto nosa lendo no noso recuncho de lectura preferido. Despois tiñamos que decorar o marco con moita ARTE. Con todas as fotos fixemos unha exposición na entrada do colexio.

Premede neste enlace para ver que bonito e artístico quedou!

O MEU RECUNCHO DE LECTURA FAVORITO

APADRIÑAMENTOS LECTORES

Esta semana conmemoramos o "DÍA MUNDIAL DO LIBRO E DOS DEREITOS DE AUTOR" polo que realizamos algunhas actividades especiais no cole. Unha delas encantounos xa que o mércores 22 voltamos ao cole de Infantil para contarlle un conto aos nenos de 3 anos. Foi unha experiencia moi agradable volver a ver as clases nas que tanto traballamos, as nosas profes, o patio...

O libro que eliximos para ler foi "A FUXIDA DO MAR" de Agustín Fernández Paz, un conto que nos trouxeron os Reis Magos e que traballamos durante este trimestre. 

Para poder entregar un agasallo aos nosos afillados lectores, fixemos un traballo especial na Biblioteca: as profes entregáronnos un papel coas instrucións para facer un barquiño de papel e folios de cores, polo que despois de ler, puxémonos a fabricar barcos. Unha vez feitos, asinámolos para que os rapaces tiveran un recordo noso e despois de lerlles o conto, entregámolos.

Eles, pola súa parte, déronnos un colgante moi artístico lembrando a data e cun autorretrato.
Se premedes neste enlace, veredes como prepararon os de 3 anos a nosa visita.

TRASNOS

O venres, pola contra, fomos nós os que recibimos a visita dos rapaces de 4º, os nosos padriños e madriñas lectores, que nos viñeron contar o seu conto preferido.

Repartímonos polo corredor, pola Biblio, pola entrada do cole... e escoitamos con atención as súas historias.

Para que sempre lembren ese día, entregámoslles uns marcapáxinas decorados por nós con moita ARTE.

FELIZ DÍA DO LIBRO!!!

NOVEMBRO: MES DA CIENCIA EN GALEGO

Esta semana na sesión de Biblioteca, as profes explicáronnos que estamos no MES DA CIENCIA E GALEGO, polo que hai un recuncho no Bibliocastelo con contos relacionados co tema. Nun deles "PREGUNTAS QUE POÑEN OS PELOS DE PUNTA 1" da editorial CUMIO, atopamos un sinxelo experimento que quixemos facer. As profes dixéronnos que os científicos fanse preguntas, e para poder resolvelas, investigan. Nós quixemos convertirnos en científicos e preguntámonos: QUE COUSAS NON PODE MOLLAR A AUGA? Como non sabiamos a resposta, despois de pensalo moito fixemos un experimento que consistiu en comparar unha vela sumerxida en auga con outra sumerxida en aceite. Ao sacalas todos observamos como a vela rexeita a auga e pola contra atrae ao aceite.

Foi moi divertido!

Se queredes ver o experimento, premede no vídeo:

PRIMEIRA SAÍDA

Hoxe fomos ao Teatro Principal de Pontevedra para ver O GATO CON BOTAS. O espectáculo consistiu nunha actuación conxunta entre a Orquestra Filharmónica de Pontevedra, Marc Taëger e Olalla González. 

A Orquestra dirixida polo compositor portugués Vasco Negreiros puxo a música, Marc Taëger ilustrou o conto cuns debuxos de sombras magníficos e Olalla González foi a contacontos.

Ao xuntar todo quedou un resultado fantástico que nos deixou sen fala durante toda a actuación.

Pagou a pena mollarse un pouquiño polo camiño!