MOCHILAS VIAXEIRAS

Xa queda pouquiño para rematar un curso onde o máis representativo foi a reapertura da Biblioteca, actualizada, renovada e chea de espazos para aprender de distintos xeitos. 

E como a biblioteca non é só un lugar pechado, unha pequena parte dela saíu ás nosas casas dentro das MOCHILAS VIAXEIRAS. 

Canta ilusión tiñamos porque nos tocara a semana de levar a mochila á nosa casa!!! E despois na clase, contarlle aos compañeiros cal foi o noso libro preferido ou ensinarlles algo do que aprendemos cos libros.

Tedes aquí unha pequena mostra das reflexións que quedaron escritas nas libretas das Mochilas Viaxeiras. Ata pronto!

CORRELINGUA

O 2 de maio fomos a Cangas para participar no Correlingua do Morrazo en compañía de miles de nenos e nenas doutros coles da nosa contorna. Alí fixemos un percorrido polas rúas lucindo as palabras galegas que decoraban as nosas camisetas (este ano, relacionadas co tema dos dereitos humanos) e falando e cantando en galego. Despois chegamos a unha explanada onde merendamos e escoitamos o manifesto do Correlingua. Finalmente UXÍA LAMBONA E A BANDA MOLONA, un grupo de música infantil en galego, nos agasallou cun concerto no que gozamos moito.
Podedes ver máis información neste enlace: CORRELINGUA

XOGANDO A APRENDER A APRENDER

XOGANDO EN EF CO ALUMNADO DE 6º

O xoves día 9 os nenos e nenas  de 1º tiveron uns mestres e mestras de EF moi novos, nada menos que os rapaces e rapazas de 6º de primaria! Compartiron xuntos unha sesión especial de clase no ximnasio da escola. O alumnado de 6º, asesorado pola profe Silvia, creou de xeito cooperativo uns materiais de xogos con obxectos de refugallo. A clase comezou distribuíndo en forma de circuíto os materiais dos xogos por todo o espazo, a continuación colocáronse por equipos maiores e pequenos onde uns facían de mestres e outros de alumnos, ao final comentaron con alegría e entusiasmo a experiencia vivida. No vídeo pódese ver un pouquiño!

CONTOS CON VALORES

CONTOS CON VALORES

O alumnado de 1º traballou  na clase de valores sociais e cívicos o conto "POR CATRO ESQUINITAS DE NADA" de Jérôme Ruillier. Despois de ler e comentar o conto conseguiron, en diferentes sesións e en equipo, ilustralo e tamén escenificalo. Como final de tarefa, gravaron  un audio e  crearon un vídeo para darlle máis visibilidade á  Igualdade e a Diferenza entre as persoas. 
Este traballo gustoulles moito!!!

METEOESCOLAS 2019

Durante os meses de marzo e abril, o alumnado de 1º estivemos recollendo os datos da estación meteorolóxica. Tivemos a sorte de atopar todo tipo de fenómenos meteorolóxicos: chuvia, vento, sarabia, trebóns, arco da vella... Observamos tamén a lúa e aprendemos as súas fases.

Finalmente, rexistramos todos os datos no recuncho do Bibliocastelo destinado ás Meteoescolas. Gustounos tanto observar o tempo que estamos desexosos de que a Meteocaixa volva ás nosas aulas.

COÑECENDO BUEU

Hoxe o alumnado de 1º fixemos unha saída cultural por Bueu. Primeiro fomos ao Museo Massó onde realizamos unha pequena visita polas distintas salas e tamén un obradoiro moi interesante chamado "Mensaxe nunha botella" no que aprendemos o importante que é coidar os nosos océanos para salvar o planeta.

Ao saír, fomos ata a praza de abastos. Alí esperábannos os praceiros e praceiras, ensináronnos moitos peixes distintos, mariscos, carnes e ata froitas e verduras. Para rematar a visita preparáronnos unha merendola na planta superior con produtos da praza: froitas e pans variados. Comémolo todo!

Ao chegar ao cole, debuxamos a praza tal e como a vimos cada un de nós.

Agradecemos a colaboración a Marta Campos e a todas as persoas que traballan na praza de Bueu.

DÍA DO AUTISMO

Hoxe, 2 de abril, conmemoramos o DÍA DO AUTISMO primeiro lemos na clase un libro sobre un neno autista, Dani, que nos axudou a comprender a estas persoas que están entre nós. 

Despois do recreo fixemos unha representación do símbolo do infinito. Cada clase puso o seu graniño de area coa colocación dun pequeno triángulo. Despois colgamos o cartel da fachada do cole para visibilizar este trastorno, cada vez más frecuente.