UNHA AVENTURA MONSTROSA

Velaquí tedes o resultado do Conto Viaxeiro que creamos entre todos os rapaces do colexio. Comezou polos peques de Infantil e ía pasando de aula en aula ata chegar a 6º. Ao final quedou un conto cheo de aventuras, intrigas, pócemas... LEDE, LEDE!

UNHA AVENTURA MONSTROSA

Publish at Calameo or read more publications.

A TEA DE ARAÑA QUE TODO O APAÑA

Durante este trimestre lemos o libro: A TEA DE ARAÑA QUE TODO O APAÑA da editorial Edebé e fixemos moitas actividades relacionadas co conto.

- Aprendemos a retahila de memoria.

- Fixemos un mural na entrada do cole.

- Debuxamos os insectos.

- Escribimos o nome dos bichos.

- Fixemos moitas series de insectos por todo o corredor.

E, como colofón, o martes recibimos a visita de Benxamín Míguez Novoa, quen nos contou e ilustrou unhas historias fantásticas nas que aparecían animais extraños, monstruos medorentos e algúns nenos do cole!!!

Mirade o resultado de todo este traballo!

UNHA HORA DE LER ESPECIAL

O venres pasado, o alumnado de 1º curso tivemos unha HORA DE LER especial: rapaces e rapazas do instituto Johann Carballeira, acompañados polo seu orientador viñeron contarnos contos.

En 1º A:

JOHANA narrou POLGARIÑO

 ISABEL leu A SEREÍÑA

En 1º B:

ICÍAR contou A BELA ADORMECIDA

e MARTÍN, OS SETE CABUXOS.

Ao rematar, nós recitámoslle a retahíla de "A TEA DE ARAÑA QUE TODO O APAÑA" e deixámoslle impresionados coa cantidade de nomes de insectos que sabemos!!!

GRAZAS A TODOS POLA VOSA VISITA E ATA O ANO QUE VÉN!

VISITA DE VIOLETA MONREAL

E por fin chegou... Fíxose esperar mais pagou a pena... O xoves despois do recreo fomos ao Bibliocastelo e... a que non sabedes quen estaba alí con Papirus? Pois si, non era outra que VIOLETA MONREAL!

É unha muller fantástica que nos deixou a todos abraiados. Tiña unha forma de falar e traballar que transmitía tranquilidade, polo que estivemos todos moi moi atentos ao que facía.

Mentres falaba ía dando forma a moitos papeis de cores e de regalo que levaba na súa maleta e pouco a pouco foi construíndo unha MENINA preciosa, que quedará para sempre no noso Bibliocastelo.

Con ela aprendemos cousas tan importantes como que os traballos hai que revisalos e corrixilos antes de que outro nolo corrixa. Tamén dixo que o traballo que facemos é para nós e non para agradar aos demais. Preguntámoslle moitas cousas e díxonos que era feliz, que lle encantaba o seu traballo e que non lle ensinou ninguén senón que aproveitou a súa afección por gardar cousas e o seu gusto por debuxar para descubrir a súa paixón: a ILUSTRACIÓN.

Pedímoslle que nos asinara os nosos libros e tamén os que creamos para ela. Ademais agasallounos cun "recordo para sempre".

Cando volvemos ás clases tratamos de imitala debuxando ou facendo a menina con papeis de cores. Fixémolo realmente ben!

GRAZAS E ATA SEMPRE VIOLETA, NON TE ESQUECEREMOS!

EXCURSIÓN DE FIN DE CURSO 2012/13

Un día de Sol, un día diferente, un día inesquecible, o día da excursión de fin de curso, martes 4 de xuño 2013.

Foi unha xornada para aprender de forma lúdica, participativa, dinámica e en contacto coa NATUREZA. Observamos moi de cerca as árbores, os arbustos, as plantas e moitos "bichos" propios do noso entorno, valoramos un pouquiño máis o importante que é para nós coidar, respectar e gozar da paisaxe natural.

Se queredes ver canto gozamos, compartindo unha xornada diferente cos nosos compañeiros e compañeiras e tamén coas nosas mestras, premede no vídeo. 

QUE SABES DE ROBERTO VIDAL BOLAÑO?

Durante este mes de maio estamos participando no xa tradicional concurso das Letras Galegas: QUE SABES DE...? Este ano adicado a Roberto Vidal Bolaño. Para participar só hai que ir ao mural que está na entrada do cole onde aparecen as caricaturas que lle fixemos os rapaces de 1º. Despois de ler a pregunta correspondente, respondémola nun papel e metémola na furna.

Xa temos 4 gañadores do noso ciclo: LAURA BOUBETA PORTELA (1ºA), NURIA ARGIBAY CAÍÑO (2ºA), ALBA VIDAL CABANELAS (2ºB) e SERGIO MALVIDO FERNÁNDEZ (1ºB).
Xa está exposta a 4ª pregunta no mural: ESCRIBE O TÍTULO DE DÚAS PELÍCULAS NAS QUE INTERVIU COMO ACTOR.
Animádevos a respondela!!!

IV CORRELINGUA DO MORRAZO

Hoxe celebramos o CORRELINGUA, unha marcha en favor da lingua galega, onde os dorsais das camisetas son as nosas palabras preferidas do galego. Este ano celebrouse en Bueu baixo o lema: O GALEGO, A CHAVE DO MUNDO.

Xa levabamos uns días preparando as camisetas decorándoas cunha palabra relacionada coa natureza. Esta mañá puxémolas xunto cunhas pañoletas e saímos do colexio. Cando chegamos á praza do Concello xa nos estaban esperando os rapaces doutros coles do Morrazo e despois de agardar un anaquiño, comezou a marcha polas rúas de Bueu. Cando rematamos o percorrido tomamos a merenda e escoitamos o manifesto. A continuación comezou o concerto amenizado por LUIS PREGO quen nos animou a cantar e bailar danzas tradicionais galegas, entre elas as que tanto tiñamos practicado "Don Melitón" e "O señor da serra". Rematamos algo cansos pero aínda quedaron folgos para voltar ao cole.

Agradecemos moito o traballo das profes organizadoras (Geli, Goretti...) e das nais que nos acompañaron durante toda a mañá. Podedes ver a noticia na prensa premendo neste enlace: FARO DE VIGO  

Podedes ver máis fotos e vídeos sobre o CORRELINGUA nos seguintes enlaces:

BIBLIOCASTELO A PEDRA

ENREDEMOS

SEGUNDO CICLO NA PEDRA

TRASNOS A PEDRA